І ў душы, і ў слове сваім ажыву…
15 студзеня споўнілася 90 гадоў з дня нараджэння Янкі Сіпакова. Імкліва бягуць гады, спяшаюцца, але колькі б часу не прайшло ў памяці людзей жыў, жыве і будзе жыць выдатны пісьменнік Беларусі, наш зямляк – Іван Данілавіч Сіпакоў.
Пра Янку Сіпакова можна гаварыць бясконца - паэт, празаік, публіцыст, перакладчык, крытык, лаўрэат Дзяржаўнай прэміі Беларусі, заслужаны дзеяч культуры Рэспублікі Беларусь. Іван Данілавіч пакінуў нам багатую літаратурную спадчыну, а яшчэ падараваў роднай Аршаншчыне сваю ўласную бібліятэку. Бібліятэка пісьменніка тэматычная і жанрава разнастайная. У ёй ёсць грунтоўныя зборы сусветнай паэзіі і прозы, літаратура па гісторыі, філасофіі, эстэтыцы, мастацтву і іншым дысцыплінам, шмат энцыклапедый, даведнікаў і слоўнікаў. Асаблівую цікавасць прадстаўляюць рэдкія выданні і кнігі беларускіх аўтараў, бо яны ўсе з аўтографамі. На сённяшні дзень фонд бібліятэкі налічвае 5268 экзэмпляраў кніг.
З 2012 года ў чытальнай зале “Бібліятэка Янкі Сіпакова” супрацоўнікамі бібліятэкі праведзена больш паўсотні экскурсій на якіх прымалі ўдзел жыхары і госці горада, сябры пісьменніка, навучэнцы школ і калледжаў. Вось і ў гэту юбілейнаю дату (90-годдзе ж дня нараджэння) бібліятэкары арганізавалі для вучняў 9 класа ДУА “Сярэдняя школа № 3 г. Оршы” экскурсію і літаратурна-музычную гасцёўню “І ў душы, і ў слове сваім ажыву…”. Вядучыя: Валянціна Самонава і Кацярына Лепешава пазнаёмілі вучняў з цікавымі звесткамі жыцця і творчасці пісьменніка. Асабліва вучням спадабалася тое, што на мерапрыемства завітала пляменіца Івана Данілавіча - Людміла Анатольеўна Рэвяка. Яна расказала, што Іван Данілавіч Сіпакоў быў чалавек моцнай волі, вельмі сціплы, прыветлівы, дабразычлівы, заўсёды гатовы дапамагчы, кожны, хто хоць раз сустракаўся з ім, адзначаў яго шчырасць і душэўную цеплыню… Юныя артысты ДУА “Аршанская дзіцячая школа мастацтваў №1” падаравалі ўсім прысутным музычныя нумары.
Бібліятэкар ААіІ Валянціна Самонава