Творы яго – крыніца жывая
У гонар знамянальнага юбілею, 95-годдзя з дня нараджэння Уладзіміра Караткевіча, 26 лістапада ў Дзіцячай бібліятэцы імя У. С. Караткевіча адбылося пазнавальнае мерапрыемства “Творы яго – крыніца жывая” для вучняў 8 «А» класа ДУА “Сярэдняя школа № 2 г. Оршы”. Мэтай сустрэчы стала далучэнне падрастаючага пакалення да багатай літаратурнай спадчыны класіка і папулярызацыя чытання.
Творчасць Уладзіміра Караткевіча – гэта не проста з’ява, а сапраўдны скарб і вяршыня беларускай літаратуры мінулага стагоддзя. Ён быў смелым першапраходцам, які адкрыў для нас жанр гістарычнага дэтэктыву. Сам Караткевіч – гэта цэлы свет, бязмежны космас, асоба, якая натхняе. Пра такога чалавека хочацца бясконца расказваць дзецям, і менавіта, з яго хочацца браць прыклад у жыцці і творчасці.
Падчас візіту навучэнцы акунуліся ў дзіўны свет творчасці Караткевіча. Спецыяльна да гэтай даты была аформлена цікавая і змястоўная выстава кніг, якая прадстаўляе разнастайныя творы пісьменніка і матэрыялы пра яго жыццё. Дзеці з вялікай увагай і дапытлівасцю вывучалі экспазіцыю. Мерапрыемства працягнулася займальнай відэапрэзентацыяй, якая падрабязна асвятляла ключавыя этапы біяграфіі і творчага шляху Уладзіміра Караткевіча. Школьнікі даведаліся мноства цікавых фактаў пра майстра слова і яго ўклад у беларускую літаратуру. Акрамя таго, навучэнцы атрымалі ўнікальную магчымасць пабачыць запіс выступлення самога Уладзіміра Караткевіча, што стала яркім і запамінальным момантам, які дазволіў “дакрануцца” да асобы пісьменніка.
Кульмінацыяй сустрэчы стаў актыўны ўдзел дзяцей у літаратурнай віктарыне, дзе яны змаглі праверыць свае веды, а яшчэ незвычайнае заданне: паспрабаваць сябе ў ролі аўтара і прыдумаць уласную казку. Асаблівым выклікам для дзяцей было выкананне двух умоў: казка мусіла быць пра горад Орша і абавязкова ўтрымліваць мараль у канцы. Гэта творчае спаборніцтва дазволіла кожнаму праявіць фантазію, веданне роднага краю і разуменне жыццёвых каштоўнасцей. Мерапрыемствы, якія праводзяцца ў бібліятэцы з нагоды юбілею Уладзіміра Караткевіча, маюць выключную важнасць. Гэта не проста даніна памяці выдатнаму пісьменніку – гэта наш неацэнны скарб, наша спадчына, наш гонар і наша памяць.
Мы павінны натхняць, вучыць дзяцей – не забываць пра свае карані, пра гісторыю свайго народа, яго культуру і мову. Любоў да Радзімы пачынаецца з любові да спадчыны. Неабходна любіць і цаніць тое багацце, што пакінулі нам продкі, бо толькі так мы захаваем сваю ідэнтычнасць і перададзім яе наступным пакаленням.
Бібліятэкар В. А. Ціханскі