Партрэт пісьменніка і чалавека
16 студзеня ў чытальную залу “Бібліятэка Янкі Сіпакова” завіталі вучні 6 класа ДУА “Сярэдняя школа № 3 г. Оршы імя У.С.Караткевіча”.
Чытальная зала “Бібліятэка Янкі Сіпакова” была адкрыта 1 чэрвеня 2012 года. Кніжны фонд налічвае звыш 5200 экзэмпляраў. Асаблівую каштоўнасць уяўляюць рэдкія выданні, а таксама беларуская літаратура (больш за 550 экз.) з аўтографамі пісьменнікаў. 21 лютага 1978 г. Уладзімір Караткевіч падпісаў сваю кнігу - казак “Чортаў скарб” так: “…Чорту Янку Сіпакову ад чорта Уладзіміра Караткевіча….”, а Рыгор Барадулін сваё выданне “Неруш” падпісаў: “…Дарагому Янку Сіпакову – паэту ва ўсіх адносінах і шчыраму сябру…”.
Бібліятэкар Валянціна Самонава пазнаёміла вучняў з цікавымі звесткамі жыцця і творчасці таленавітага пісьменніка. Асабліва ўразілі вучняў творы, якія пісьменнік прысвяціў сваёй малой Радзіме. Яны пранікнуты любоўю:
“…Люблю я Радзіму ад краю да краю,Люблю шматпакутную нашу зямлюЗ табой, Беларусь, я жыву, бы спяваюЯ жыць без цябе, Беларусь, не магу…” Я. Сіпакоў.Зацікавіла вучняў кніга – эсэ “Зялёны лісток на планеце Зямля”, якую Іван Данілавіч пісаў каля пяці гадоў. Гэта выданне можна смела назваць энцыклапедыяй нашага краю і нашага жыцця. Кожнае эсэ расказвае пра Радзіму, яе гісторыю, культуру. “…Любая Радзіма! Вельмі шаноўная мая Беларусь! Маці наша родная – усіх нас разам і кожнага паасобку! Нізка схіляюся перад табою ў пашане ўжо толькі за тое, што ты заўсёды ёсць і заўсёды будзеш…”.
Дзеці з задавальненнем слухалі, задавалі пытанні, разглядалі асабістыя рэчы і фотаздымкі пісьменніка.
Бібліятэкар ААіІ Валянціна Самонава.