Хто смяецца апошнім?
Беларуская літаратура багата на таленавітыя творчыя асобы, сярод іх велічна, непаўторна і яскрава вылучаецца Кандрат Крапіва. 2 сакавіка ў Цэнтральнай бібліятэке імя А.С. Пушкіна адбылася паэтычная сустрэча “Хто смяецца апошнім…”, прымеркаваная да 130-годдзя з дня нараджэння Кандрата Крапівы.
Кандрат Кандратавіч Крапіва – знакаміты беларускі паэт, празаік, драматург, вучоны. Яго творчасць - цэлая эпоха ў гісторыі беларускай літаратуры. Сатырык-байкапісец, драматург Кандрат Крапіва ўзбагаціў беларускую літаратуру шматлікімі творамі, разнастайнымі па жанры і тэматыцы, у якіх адлюстраваў жыццё нашай краіны на розных этапах яе развіцця. “Жаба ў каляiне”, “Дыпламаваны баран”, “Ганарысты парсюк”... Хто па школьнай праграме не памятае баек Кандрата Крапівы? Вядомы байкапісец быў шматграннай асобай і пражыў доўгае жыццё, багатае падзеямі.
Бібліятэкары – Валянціна Самонава і Кацярына Лепешава расказалі вучням восьмага класа сярэдняй школы №8 пра жыццё і творчасць пісьменніка. Увазе вучняў была прадстаўлена кніжная выстава “Пісьменнік яркага таленту”, на якой былі змешчаны творы знакамітага беларускага аўтара розных гадоў выдання, а таксама крытычныя і публітыстычныя артыкулы, эпісталярная спадчына, летапіс жыцця і творчасці. Таксама удзельнікі мерапрыемства праглядзелі кароткаметражны відэа-фільм пра жыццё і творчасць Кандрата Крапівы.
Музычныя нумары у выкананні настаўнікаў і вучняў “Аршанскай гарадской дзіцячай школы мастацтваў” напоўнілі залу глыбокімі пачуццямі ўрачыстасці і добрага настрою. Хочацца нагадаць - чытайце і перачытвайце творы Крапівы, адкрывайце для сябе цікавае, нязведаннае!
Бібліятэкар ААіІ Кацярына Лепешава