Мележа слова крочыць па свеце
6 лютага ў гонар 105-годдзя з дня нараджэння І. Мележа і ў рамках рэспубліканскага праекта “Кожная пятніца - роднае, сваё” ў Цэнтральнай бібліятэцы імя А. С. Пушкіна прайшла літаратурна-музычная гасцёўня “Мележа слова крочыць па свеце”.
Вядучыя: Валянціна Самонава і Кацярына Лепешава пазнаёмілі вучняў 10-га класа ДУА “Сярэдняя школа № 16 г. Оршы” з цікавымі звесткамі жыцця і творчасці Івана Паўлавіча, прадставілі відэа-прэзентацыю. Пра Івана Мележа можна гаварыць бясконца – народны пісьменнік Беларусі, празаік, драматург, лаўрэат шматлікіх літаратурных прэмій. Ён пакінуў нашчадкам вялікую літаратурную спадчыну, але ў гісторыю беларускай літаратуры ўвайшоў найперш як аўтар нацыянальнага эпасу – трылогіі “Палеская хроніка”. Раманы “Людзі на балоце”, “Подых навальніцы” і Завеі, снежань” былі перакладзены на рускую, нямецкую, кітайскую і іншыя мовы, дзякуючы чаму аўтар атрымаў сусветную вядомасць.
Вучні даведаліся, што Івану Мележу прыйшлося прайсці праз жахі Вялікай Айчыннай вайны, першае ў сваім жыцці апавяданне на беларускай мове “Сустрэча ў шпітале” ён быў вымушаны пісаць левай рукой, бо быў паранены і знаходзіўся ў шпіталі, а яшчэ даведаліся пра музей, які знаходзіцца на радзіме пісьменніка ў вёсцы Глінішча Хойніцкага раёна Гомельскай вобласці.
Усім прысутным Яўгенія Сянькоўская і Карына Забаронак падаравалі музычныя нумары.
Бібліятэкар ААіІ Валянціна Самонава