Сустрэча з класікам
З мэтай папулярызацыі творчай спадчыны Івана Шамякіна 27 студзеня ў бібліятэцы імя У. Корбана для навучэнцаў 10 “А” класа ДУА “Гімназія № 1 г. Оршы імя Р. В. Сяменава” быў праведзены літаратурны ўрок “Іван Шамякін: чалавек, пісьменнік, майстар”, прымеркаваны да 105-годдзя з дня нараджэння Народнага пісьменніка Беларусі.
Загадчык бібліятэкай І. Дзярабіна расказала аб біяграфічных звестках і творчым шляху пісьменніка. Гімназісты даведаліся аб гадах дзяцінства, якое прайшло на ўлонні прыроды, гадах ваеннага ліхалецця, ў час якіх І. Шамякін служыў камсоргам дывізіёна, пазнаёміліся з цікавымі звесткамі з жыцця і творчасці пісьменніка. Вынікі 60-гадовай творчай працы беларускага класіка – 130 кніг, агульны тыраж якіх склаў звыш 25 мільёнаў экзэмпляраў.
Некаторыя творы пісьменніка экранізаваны. Вядомасць Івану Шамякіну прынёс першы раман “Глыбокая плынь”. Бібліятэкар звярнула ўвагу вучняў на бібліятэчную выставу “Іван Шамякін: чалавек, пісьменнік, майстар”, на якой былі прадстаўлены раманы, аповесці і апавяданні І. Шамякіна рознай тэматыкі: аб Вялікай Айчыннай вайне, жыцці калгаснікаў і сельскай інтэлігенцыі, пра каханне і любоў да жыцця. Гэта творы “Глыбокая плынь”, “Сэрца на далоні”, “Зеніт”, “Шлюбная ноч”, “Злая зорка”, “Трывожнае шчасце”, “Слаўся, Марыя!”, “Вазьму твой боль” і іншыя, якія дапамагаюць людзям у іх роздуме над жыццём, прызначэннем чалавека, сэнсам яго існавання.
Падчас мерапрыемства падлеткі пагляделі ўрыўкі з дакументальнай стужкі “Трывожнае шчасце пісьменніка”. Сустрэча атрымалася пазнавальнай і пакінула станоўчыя эмоцыі ў душы кожнага прысутнага.
Загадчык бібліятэкай І. Дзярабіна