Беларускае слова
Кожны год 21 лютага ва ўсім свеце адзначаецца Міжнародны дзень роднай мовы. На нашай планеце вельмі шмат цудоўных моў. У нас, беларусаў, ёсць свая родная мова: мілая, шчодрая, чароўная, пяшчотная, гучная, песенная, паэтычная – беларуская мова. 18 лютага ў Дзіцячай бібліятэцы імя У.С. Караткевіча была арганізавана кніжная выстава “Жывое ў вяках беларускае слова...”, а 21 лютага прайшла акцыя “Словы цешаць, як крынічка...”
Асаблівую ўвагу наведвальнікаў бібліятэкары звярнулі на кніжную выставу, якая раскрыла юным чытачам асаблівасці беларускай мовы. Кожны ўдзельнік змог пазнаёміцца з лепшай літаратурай, пачытаць услых творы на роднай мове і атрымаць ад гэтага моманту вялікую асалоду.
Што ні кажыце, беларускае слова гучыць вельмі прыгожа! Наша мова прайшла доўгі шлях, на якім былі як часы росквіту, так і заняпаду. Самае галоўнае для нас зараз: захаваць, не згубіць родную мову, а для гэтага трэба – як мага часцей размаўляць на ёй! …І чытаць!
Усіх жадаючых запрашаем у бібліятэку пазнаёміцца з кніжнай выставай “Жывое ў вяках беларускае слова...”, якая будзе праходзіць па 27 лютага.
Бібліятэкар Ціханскі В. О.