Любіце і шануйце родную мову!
21 лютага весь свет адзначае Мiжнародны дзень роднай мовы. Эрудытаў і знаўцаў беларускай мовы ДУА “Сярэдняя школа №7 г. Оршы” сабраў урок-свята “Жывая, любая, непаўторная…”, які быў падрыхтаваны супрацоўнікамі бібліятэкі імя М. Горкага.
Вучні даведаліся аб разнастайнасці моў на планеце, пра тое, што родная мова – гэта характар народа, яго памяць, гісторыя, духоўная магутнасць. Мова – гэта не толькі інструмент для зносін паміж рознымі людзьмі. Значэнне роднай мовы ў жыцці чалавека куды больш глыбокае і важнае.
У гэты дзень кожны мог праверыць свае веды беларускай мовы. Для гэтага вучні 3-4-х класаў смела адказвалі на пытанні, мужна перакладалі тэрмiны, узгадвалі выказваннi пра родную мову. Дзеці з ахвотай прымалi ўдзел у тэматычных гульнях i з задавальненнем размаўлялi на роднай мове падчас моўнай хвілінкі “На мове роднай размаўляю”. Усе разам сталі ўдзельнікамі інтэлектуальнай гульні “Куфэрак беларускай мовы”. Перакладалі словы з рускай мовы на беларускую і наадварот, тлумачылі сэнс фразеалагізмаў, вучыліся чытаць скарагаворкі, з задавальненнем збіралі “рассыпаныя” прыказкі.
Сваю родную мову трэба берагчы, захоўваць і ўмець правільна на ёй гаварыць. Адчуць мову, яе разнастайнасць, меладычнасць дапамагаюць вершы. Таму напрыканцы мерапрыемства вучні прачыталі верш Максіма Танка "Родная мова". Мерапрыемства атрымалася яскравым і вельмі шчырым, таму што ўсе ўдзельнікі імкнуліся прызнацца ў любві да роднай мовы.
Бібліятэкар С.У. Колабава